Ensera raja nyumbuh ngangau ke manang pipit.

            

            Nyadi agi jeman dulu kalia, lebuh samua jelu dalam dunya tu agi mereti ka jaku pangan diri. Dia kenu ko leka ensera tu bisi siku Raja Nyumbuh ti amat mancal enggau selalu ngacau orang. Tudah tuai tu sigi enda mereti jaku laban ia sigi jelu ti besai sereta kering ari jelu lain. Lengan ia mesai pucuk tapang,  pah ia baka gunung jabang,  tubuh ia sepemanyai sungai madai,  laban nyak mega ia ngumbai diri empu raja ba kampung nya. Berengkah ari nya bala jelu lain ba kampung nya ngumbai ia Raja Nyumbuh bujang regas pemulas jagung muda, bujang changka mali mulai jari nyapai. Ensumbar tu diberi ngagai ia laban enti utai ka udah terengkah ba jari ia sigi enda pulai agi. Tang munyi ko ensera Raja Nyumbuh tu sigi enda peduli utai ka dipadah ka orang laban ia ngira diri empu aja.

            Nitih ka tusui orang kelia suba bisi dua iku jelu ka belaya ba sungai temesu pabuk di nanga ampuh pauh bah sekayu raya. Jelu nya dikumbai gerama umai kigang-kigang nyepuh ka ipuh tumbang ga serapuh. Nyadi jelu ka enggau ia belaya nya dikumbai ringin bujang ngedang mua pemansai, mansai undai mayuh betubuh mai sungai keruh berambuh. Utai ti dikelaya ka seduai ringin enggau gerama tu ba sentang siku ikan ka dikumbai ikan emplasik rauh-rauh ba ili ti ditangkap seduai ia ba aik temesu nyak. Laya seduai nya mula maya tudah gerama ngiga pemakai ba tisi batu kena ngisi perut ko jaku, tudah ringin tu agi mansai ba baruh pendaik endur sida mandi. Udah ka enda lama mega pansut meh tudah ikan emplasik tu ari dalam sungai kenu ko jerita. Pemuas ia tudah ringin tu pan tepada ka ikan emplasik  lalu ngagai tudah sepemanjai sungai nya, nyau pengelama seduai begagai ikan emplasik ti lalu tamak ba baruh batu alu dikepit tudah gerama ngena sepit ia. “Nyak iya bulih” ko gerama meda iya ulih tesepit ka ikan emplasik nyak. “

            Pengudah nyak ringin pan datai ba diak alu ngambu ikan ka bisepit gerama nyak empu iya. Gerama madah ka diri bulih ikan emplasik nyak ba baruh batu endur iya mansai. Tang ringin enggai alah lalu madah ka ikan nyak sigi udah diempu iya laban udah lama digagai iya ari penatai. Pengelama seduai becekih mansak tudah Raja Nyumbuh ka baru pulai nugal.. Ninga laya seduai ringin enggau gerama, diak iya alu berunding keni ka beduan seduai nyak alu ngulih ka ikan ti dikelaya ka gerama enggau ringin. “ dik nyak ringin kaban aku nyala suba?” tanya Raja Numbuh. “Auk …aku meh tu isan “ ko saut ringin. Diak tudah nyumbuh pan lalu mansang ngagai seduai gerama alu nanya “nama seduai tak rauh-rauh dinga aku ari umai tadi? “ ko tudah nyumbuh ngaga diri enda nemu. Tudah ringin pan alu nusi ka kebuah seduai iya gerama belaya ngagai nyumbuh. Tudah nyumbuh pan ngaga diri berunding alu madah ka diri nemu chara keni ka nusun penyarut tu.

                    

             Meda utai baka nyak gerama enggau ringin pan nitih ka aja meh jaku tudan nyumbuh nyak tadi. Raja Nyumbuh pan alu madah ka seduai chara ka paling manah kena ngatur penyarut tu mesti ngena jalai bepekit. Atur pekit tu bejalai ngena chara nikau ka ikan nyak pulai ka sungai baru alu serama seduai ringin diasuh nangkap ikan nyak. Barang sapa ka ulih nangkap iya siku nyak meh empu ikan ka amat. Ninga kenya ka meh seduai dua nyak tadi alu ngasuh tudah nyumbuh nyadi tuai pekit nyak. Maya ringin enggau gerama sedia ka terejun agi aik tudah nyumbuh alu nyerauh “sa…dua…tiga!”. Alu diambi tudah nyumbuh buah engkabang ka bisi ba tisi kaki iya lalu ditikau ka  ngagai sungai. Pengudah buah nyak labuh ba aik nyak seduai ringin enggau gerama alu engkecit ka dalam aik lalu jemerai nyiga alai ikan nyak labuh. Tang ka amai iya nyumbuh udah ngelalai ka ikan nyak ba sintong iya. Tudah nyumbuh alu pulai ka rumah iya laban udah bulih ngemelik ka gerama enggau ringin. Nyak meh kebuah saritu bala ringin agi diau ba ulu sungai enggau kebuah gerama idup ba selepak batu , seduai tu agi betapat ka pekit ngiga ikan emplasik nyak nyentuk ka diatu.